Arkamurka natura elkarteak antolatuta, Lurralde basatia dokumentala emango dute etzi, ostegunez, Modelo aretoan. Iñaki Atxa argazkilari eta ikus-entzunezkoen sortzailearen lana da, eta bera ere izango da osteguneko hitzorduan. Izan ere, solasaldia eskainiko du proiekzioa amaitzean.
"Natura eta fauna basatia maite badituzu, ezin duzu galdu hurrengo hitzordua", azpimarratu du Arkamurkak. Atxak ibilbide luzea du munduko txoko askotan fauna basatia grabatzen eta argazkiak ateratzen. Bere begirada zorrotz eta hurbilak aukera ematen du inguruko animalien bizitza isila eta askotan ikusezina dena ezagutzeko.
Saioa 19:00etan hasiko da, eta ondoren egilearekin izango den solasaldia euskaraz egingo dutela jakinarazi dute.