Aldi baterako erakusketa berria zabaldu dute Ipar kaleko Lukas ardotegian. Oraingo honetan, itsas hondoko bitxien inguruko argazkiak daude ikusgai ostalaritza lokaleko hormetan. Ibon Zikunegi suhiltzaile ohi eta urpekari zarauztarrak Indonesiara eginiko bidaia batean ateratako irudiak dira, hain zuzen ere.
Bereziki, nudibrankioak eta itsas zaldi pigmeoak dira nagusi Zinkunegiren erretratu koloretsuetan. Milimetro gutxiko itsas animalia hauek ezagutzeko aukera paregabea, zalantzarik gabe. Erakusketak hilabete inguru iraungo du.