Zarauzko Turismo Bulegoak 2025eko balorazioa egin du, eta jakitera eman duenez, 41 mila pertsona baino gehiagori eman zioten arreta iaz. Datu zehatzagoak ere eman ditu; izan ere, esan du kopuru oso horretatik 31.926 Turismo Bulegora joan zirela, eta beste 9.270 lagunek malekoiko informazio puntua erabili zutela ekainetik irailera bitartean.
Horrez, aparte, aitortu dute gero eta gehiago direla Turismo Bulegora gerturatzen diren zarauztarrak; hala nola, programazioen, garraio publikoaren edota informazio orokorraren inguruko zalantzak argitzera joaten dira.
Araba, Bizkai eta Gipuzkoakoak dira erabiltzaile gehienak, eta haien atzetik daude Kataluniakoak eta Madrilgoak, hurrenez hurren. Bestalde, Gaztela eta Leongo bisitari kopurua igo egin da, baita Nafarroakoa ere. Aragoiko bisitari kopuruak, aldiz, behera egin du. "Atzerritarrei dagokienez, turisten ia %40 frantsesak izan dira, iazko zifra pixka bat igoz. Bestalde, Alemaniako, Herbeheretako eta Erresuma Batuko merkatuak garrantzitsuak izaten jarraitzen dute", gehitu du Turismo Bulegoak.
Hizkuntza
Hizkuntzari dagokionez, Turismo Bulegoak dio gaztelania eta euskara direla bertan gehien erabiltzen diren hizkuntzak, "bulegora datorren jende gehiena zarauztarrak eta Euskal Autonomia Erkidegotik eguna pasatzera datozen txangozaleak izanik".
Jendeari arreta eskaintzeaz gainera, Zarauzko Udaleko Turismo departamentuak ekintza eta egitasmo ugari antolatzen ditu urtean zehar herritar zein turistentzat. Hitzordu horien artean daude, esaterako, herri kirolak, erromeriak, estropadak edo artzain-txakur txapelketa. Era berean, familia turismoari ere garrantzia ematen dio Turismo departamentuak: "Jasangarritasuna eta elkarbizitza errazten ditu, jasotzen den turistaren profila lasaia eta fidela izanik".
Hori gutxi balitz, gastronomiaz ere arduratzen da: "Gure nortasunaren alderdi garrantzitsu bat bezala lantzen du Turismo departamentuak, garaiko sukaldaritzaren, tradizioaren eta bertako produktuen sustapena eginez". Honetarako, urtean zehar hainbat ekitaldi antolatu, kudeatu eta sustatzen ditu departamentuak, Sagardo eta Txakolin egunak edo Kosta Gastronomika bezalako ekitaldiak, kasurako.