Amenabar Zarautzek hortzak erakutsi zizkion atzo Bidasoa Irun taldeari Euskal Kopa finalean, eta partida borrokatua bezain saiatua jokatu ondoren, 34-40 galdu zuen azkenean. Emaitzak bestelakoa adierazten badu ere, partida oso parekatua eta intentsitatez beterikoa izan zen, eta Amenabar denbora luzez aurretik joan zen markagailuan.
Ligan erakusten ari den maila bikaina kantxaratu zuten Mikel Agirrezabalagaren mutilen Zumarragako Ispilla kiroldegian, eta neurketaren zati handi batean ametsa egi bihurtzeko bidean izan ziren kortsarioak. Abantaila txikiarekin, baina, aurretik joan ziren lehen zati osoa, eta 19-18 irabazten iritsi ziren atsedenaldira.
Bigarren zatian ere atzeko dinamikarekin jarraitu zuten, baina azkeneko hamar minutuan Bidasoak aldea irekitzea lortu zuen, defentsa doituz eta erasoan eraginkortasun handiagoa erakutsiz. Une horretan, irundarrek gora egin zuten eta zarauztarrek behera, eta hortxe geratu zen erabakita partida, sei goleko aldearekin.