Espainiako Hickory Golf Elkartearen ekimenez, Golfeko Hickory Open txapelketa jokatuko dute bihar goizean Zarauzko golf zelaian. Txapelketa honetan antigoaleko moduan lehiatzen da, duela 100 urte egiten zen bezala: XX. mendeko 20ko hamarkadako golfeko arroparekin eta ekipamenduarekin, hain zuzen ere. Zarautzen laugarren urtez jarraian antolatu dute kirol hitzordua.
Bi modalitatetan jokatuko dute txapelketa: open mailan eta amateur mailan. Irteera 09:00etan egingo dute, eta zelaiko hemerzortzi zuloak egin ondoren, erabakiko da aurtengo txapelduna open mailan; hauek Stroke Play diziplinan jokatuko dute. Amateurrek, berriz, bederatzi zulotara egingo dute lehiaketa. Amaieran, sari banaketa, lagunarteko argazkia eta bazkaria izango dute klubean.