30 urteko ibilbidearen ondoren, Eraso! musika taldeak agurreko kontzertua emango du bihar iluntzean Tolosako Bonberenean. Azken emanaldi-festa hiru hamarkada luze hauetan alboan izan dituzten guztiekin ospatu nahi duela iragarri du, gainera. "Gau berezia izango da, bakarra eta errepikaezina: indarrez, oroitzapenez eta emozioz betetako kontzertua, Eraso! taldearen historia merezi duen moduan ixteko", adierazi dute sare sozialen bidez.
Zarauzko laukoteak Azken batean azken diskoa argitaratu zuen iazko maiatzean, hamabi abesti berrirekin, eta agurreko diskoaz eta biraz gozatzen aritu da Euskal Herrian barna urtebete pasatxoz. Orain, behin betiko kontzertua etorriko da, Eraso! taldearen historiako azken kapitulua itxiko duena. "Azken finean, hainbeste bizipen partekatu ditugu batera, onak zein txarrak, eta orain, gainera, agur esango dugu ozen guztien aurrean, gustura eta pozik", adierazi zuen Sertx taldekideak diskoa atera berritan, Gukari emandako elkarrizketan.
Bonbereneako azken kontzertua 22:00etan izango da, eta aretoko ateak 21:00etan zabalduko dituzte. Lagunarteko saioa izango da, eta hainbat gonbidatu izango dituzte oholtza gainean; bestea beste, Eraso!-ko kide izandako Amaiur Cajaraville eta Ander Izeta. Sarrera guztiak agortuta daude dagoeneko.