Gaur eguerdian zuen jarria Zarauzko Udalak joan den urrian hil zuten Yoanna Acedo zarauztarra gogoratzeko ekitaldia. Hunkigarria izan da, bertan izan baitira familia eta hainbat lagun, baita babesa adierazi nahi izan duten ordezkari publiko eta dozenaka zarauztar ere.
Xabier Txurruka Zarauzko alkatearen hitzetan, "handia da sumindura eta mina, Yoanna indarkeria matxistak hil zuelako". Gainera, Acedori eta familiari "errespetua" zor zaiela nabarmendu du alkateak, eta gehitu du horrelako gertaera bat "matxismoaren adierazpen larriena" dela, "duintasunaren eta osotasun fisiko naiz moralaren aurka" egiten duena. Indarkeria matxistaren aurkako borrokan denek izan beharko luketen "jarrera aktiboa" azpimarratu du, eta bide horretan, udalaren aldetik dagokion "laguntza guztia" emateko prest daudela nabarmendu du.
Gloria Vazquez Berdintasun zinegotziak ere garbi utzi nahi izan du Acedo indarkeria matxistak hil zuela, eta denen ardura dela hori salatzea. Ekitaldiaren helburua horixe izan dela azpimarratu du eta, jarraian, Yoanna Acedoren amak, Mertxek, idatzitako gutun gogor eta hunkigarria irakurri du. Bertan, oraindik familiak egunero bizi beharreko sufrimendu eta mina aipatu ditu, eta esker oneko hitzak zuzendu dizkie babesa eskaini dion jendeari. "Nire alabak disdira berezia zuen, ilusioa zen, goxotasuna. Ametsak zituen betetzeko, bide berriak bilatzeko, baina norbaitek bere etorkizuna lapurtzea erabaki zuen, eta bera hiltzeaz gain, gure bizitzak hautsi zituen", irakurri du.
Garazi Etxaburu dantzariak ere emozioz betetako bi dantza eskaini ditu, eta une oro egon da Lege Zaharren Enparantzan Acedo gogoratzeko lore sorta mardul bat.