Zainketa pertsonala eta etorkizuneko plangintza aztergai duten hitzaldi zikloa antolatu du Zarauzko Udaleko Gizarte Zerbitzuek hilabete honetarako, hainbat adituren eskutik. Gaien inguruko informazioa emateaz gain, hausnarketarako eta erabakiak hartzen laguntzeko bide eman nahi dute hitzorduek; besteak beste, "etorkizunean nola zainduak izan nahi dugu?" edota "zer erabaki hartuko ditugu?" galderei pistak eman. Guztira lau saio izango dira eta guztiak Antoniano aretoan izango dira, 18.00etan hasita.
Lehen hitzaldia datorren asteatean izango da, azaroaren 11an, Herentziak testamentuak eta familia harremanak izenburupean, eta Juanjo Alvarez Zuzenbide pribatuan katedradunak eta EHUko irakasleak emango du gaztelaniaz. Ostegunean, azaroaren 13an, bizitzaren amaierarako erabakien inguruko Aurretiazko borondateen dokumentua eskainiko du Iñaki Peña medikuak; solasaldia elebitan izango da.
Esku Hartze Etika Batzordeko kide Olaia Aranak bizitzaren zaintza modu partekatuan planifikatzeko gida azalduko du azaroaren 18an, elebitan, Zuk jakitea nahi dut hitzaldian. Azken hitzordua hilaren 26an izango da, eta bertan prebentziozko notario-ahalordez, izatezko zaintzaz eta kuratelaz ariko da EHUko irakasle Maria Lourdes Labaka; hitzaldi hori gatelaniaz izango da.