Bertsolari Gazteen XLIX. Lizardi Sariko bigarren kanporaketa izan zen atzo Santa Klara komentuko aretoan. Irailaren 5ean jokatuko da finala, eta atzoko saioaren ondoren, argitu da nortzuk izango diren finalean: Irati Alcantarilla, Elixabet Etxandi, Janire Arrizabalaga, Iker Ormazabal Tturko, Maddi Agirre eta Aimar Sorazu sailkatu dira, hain zuzen ere.
Saio nahiko parekatua izan zen atzokoa: Irati Alcantarilla urruñarra nagusitu zen, 217,5 puntu bilduta; bigarren egin zuen Janire Arrizabalagak, 209,5 puntu poltsikoratuta; eta hirugarren Aimar Sorazuk, 204,5 punturekin. Gainerako bost bertsolariak koska bat beherago geratu ziren: Irune Basagoiti (196,5) eta Eli Zaldua (196) pareko aritu ziren, eta haien atzetik sailkatu ziren Joanes Azpillaga (190), Igauri Lopetegi (180,5) eta Oibar Olano Azkonita (162,5).