Buztinzuri haltzadia eta Irita-Astiko hezeguneak ezagutzeko aukera izango dute bihar herritarrek, Eraztun Berde Urdinak antolatutako bisitari esker. Uztailaren 4az geroztik ari da EBU bisita hauek antolatzen, eta hezeguneak ez ezik, Arkamurkako eta Iñurritzako ibilbide gidatuak ere ari da egiten.
Hala, biharko bisitan parte hartu nahi dutenek 18:00etan azaldu beharko dute suhiltzaileen biribilguneko autobus geltokira, bertatik hasiko baitute ibilbidea. Doakoa izango da bisita, baina plazak mugatuak dira; beraz, beharrezkoa da aurretik izena ematea. Erreserba egiteko, Zarauzko Turismo Bulegora joan, deitu edo idatzi daiteke, baita zarautz@eraztunberdeurdina.eus helbidera mezu bat bidali ere.
Datorren astean egingo ditu EBUk uda sasoirako prestatutako azken irteerak. Irailaren 5ean Arkamurka ibilbidea egingo dute, eta 6an Iñurritzako bisita gidatuaren txanda izango da.