Ostiralean eta larunbatean eskainiko dituzte Santa Klara komentuan 37. Musikaldiko azken bi kontzertuak. Zehazki, Ana Nebot sopranoak eta Arkaitz Mendoza piano jotzaileak errezitaldia eskainiko dute ostiralean, eta Maren Otegi musikari zarauztarra Trio Marearekin igoko da oholtzara larunbatean. 20:00etan izango dira bi hitzorduak. Sarrerak Modeloko txarteldegian nahiz hemen eros daitezke, 4,15 euroren truke bakoitza.
Ostiraleko emanaldiak lirika iberoamerikarraren mosaiko "aberatsean" zehar egingo du bidaia. Hain zuzen ere, Kataluniako Ganbera kanta delikatuak, Euskal Herriko elementu herrikoiak eta egitura akademikoak, Galiziako tradizioa eta folklorea, Atlantikoaren bestaldeko harmonia beroak eta erritmo folklorikoak, eta Espainiako genero txikia, zarzuela, izango dituzte gozagarri entzuleek. Musikagile horiek, elkarrekin, "tradizioa, poesia eta modernitatea uztartzen dituen soinu-panoramika" eskaintzen dute.
Otegi piano jotzaile zarauztarrak Maria Khachatryan biolontxelo jotzailea eta Monica Perez biolin jotzailea izango ditu alboan, eta Trio Marea izenpean ariko dira larunbatean. Bere musikarekin paisaia emozionalak sortuko dituzte, eta arte eszenan erreferente berritzailea izatea bilatuko dute, ganbera musika espazio eta publiko anitzetara eramanda. "Esperientzia musikal paregabeak" sortu nahi dituzte, eta ganbera musikaren "edertasuna eta sakontasuna" aztertzera gonbidatuko dute publikoa.
Otegi, betidanik musikazale
Zarauzko musika eskolan hasi zituen piano ikasketak Maren Otegik, eta Donostiako Francisco Escudero Musika Kontserbatorio Profesionalean jarraitu zuen. Gaur egun, piano klasikoaren interpretazioa ikasten ari da Nafarroako Goi Mailako Musika Kontserbatorioan. Hainbat lehiaketetan parte hartu du, hala nola Euskadiko Musikari Gazteaken eta Andoaingo Piano Jaialdian. Piano jotzaile handien maisu eskolak jaso ditu, besteak beste Gustavo Diaz Jerezenak, Miguel Ituarterenak eta Leonel Moralesenak.