Produktu ekologikoak herritarren eskura jarriko dituzte bihar Lege Zaharren Enparantzan. Izan ere, Biolur elkarteak Nekazaritza Ekologikoaren Azoka antolatu du beste urtez, herritarrek zein bisitariek lurraldeko elikagai ekologikoen aniztasuna eta kalitatea ezagutzeko aukera izan dezaten.
Ingurumenarekiko errespetuz eta kimikorik gabe ekoitzitako produktuak izango dira protagonistak bertan. Elikagai hauek Europar Batasuneko hosto berdea duten etiketen bidez identifika daitezke. Biolurren esanetan, "elikagai ekologikoen kontsumoa eguneroko praktika bihurtzea gakoa da, eta horretarako, azoka hauek funtsezko topagune dira herritarrak informatzeko eta kontzientziatzeko”.
Horrelako azokak tokiko ekoizle txikien lana ikusarazteko, herriko kaleetan zuzeneko salmentarako gunea aldarrikatzeko, landa eremua kalera gerturatzeko eta herritar eta ekoizleen arteko harremanak eraiki eta saretzeko "funtsezko" eremuak direla ere gehitu du elkarteak.
Sukaldaritza tailerra
Azokaz gainera, aurten sukaldaritza saioa ere izango da Lege Zaharren Enparantzan. Ekoizpen duina kontsumo herrikoia izenburupean errezeta ezberdinak egiten irakatsiko du Miriam Ortiz tolosarrak. 12:00etatik 14:00etara izango da saioa, eta irekia izango da.
Besteak beste, saioaren helburuak dira herritarrak gerturatzea, jakin-mina piztea eta kontsumo ekologikorako pausoak erraztea.
Inaxio Illarramendi Zarauzko Udaleko zinegotziaren iritziz, "azoka ekologikoa Lege Zaharren Enparantza bezalako plaza garrantzitsu batean antolatzea oso aberasgarria da bai herriarentzat, bai uda denboraldian Zarautzera bertaratzen diren bisitarientzat ere". Azoka ekologikoa elikadura osasungarri, jasangarri eta bertako eta garaiko produktuen "isla" dela dio zinegotziak.