Atzo hasi zen Zarauzko Aste Nagusiko ospakizunak, eta jai egun horien bueltan udalak antolatu dituen ekitaldi batzuek eragina izango dute trafikoan, hala nola su artifizialen emanaldiek eta Zarauzko ikurriñaren estropadek.
Gaur eta bihar, 23:00etan hasita, izango diren su artifizialen emanaldiak dira aldaketen arrazoi nagusienetarikoak. Hitzordu horiek irauten duten bitartean –22:45etik 00:00etara–, itxita izango da Zarautz eta Getaria arteko errepidea. Hain zuzen, Santa Andra Mariaren zeruratzea parrokiaren parean moztuko dute trafikoa, emanaldia behar bezala egin ahal izateko.
Bestalde, Eusko Label eta Euskotren ligetako estropadak izango dira bihar eta etzi. Estropada horien azpiegiturak hartzen duen tokia dela eta, Zarautz eta Getaria arteko errepidearen zati batean, lehenengo tunelaren ostean, semaforo bidez kontrolatuko dute trafikoa larunbateko 14:30etik igandeko 16:00etara bitartean.