Erabakita gelditu dira Patxi Zaporraren LIV. Oroimenezko pilota txapelketako finalistak. Atzo jokatu zituzten bi finalerdiak, 18:30ean hasita Frontoi Txikin, eta 22-17 emaitzekin amaitu ziren bi norgehiagokak.
Batetik, Urbieta-Bereau eta Carricart-Aranburu bikoteek jokatu zuten lehia, eta aurrenekoentzat izan zen garaipena; alegia, Urbieta eta Bereaurentzat. Bestetik, Bidezabal-Gurutzealde eta Eskudero-Urruzola bikoteak lehiatu ziren, eta bigarren horiek lortu zuten finalerako txartela.
Finala bihar bertan izango da, hori ere Frontoi Txikin. Aurrena, ordea, hirugarren eta laugarren postuak erabakitzeko partida jokatuko dute, 18:30ean hasita. Xabier Carricart-Antton Aranburu eta Jokin Bidezabal-Oier Gurutzealde bikoteek jokatuko dute partida hori.
Ondoren, kadeteen finala izango da: Eneko Bidezabal-Ekain Olano bikoteak Aitor Karrera-Iker Artola bikotea izango du aurrez aurre. Azkenik, final nagusiaren txanda etorriko da: Jon Eskudero-Julen Urruzola eta Jon Urbieta-Oier Bereau bikoteen artean lehiatuko dute txapela.