Haur eta Gazte Literaturaren Nazioarteko Egunarekin bat, 43. Lizardi Sariaren ekitaldia egin zuten atzo arratsaldean Modelo aretoan. Alaine Agirre idazle bermeotarra izan da azken edizioko irabazlea, Euri eta ateri ipuinari esker, eta, zalantzarik gabe, bera izan zen saioko protagonista nagusia. Baina egileak saria jaso eta hitza hartu aurretik, azken aldietan bezala, ekitaldiak protokolo literario bat jarraitu zuen.
Nahikari Gabilondo zeremonia maisu lanetan, saioa gidatu zuen hasieratik bukaeraraino, eta oholtzara deitu zuen lehen gonbidatua Idoia Garzes idazlea izan zen; 2019an bera izan zen Lizardi Sariko garailea. Gazte literaturaren inguruko manifestua irakurriko zuen; bere hitzetan, "manifesta". Adierazi zuenez, ez da literatura onik eta txarrik existitzen, "literatura baizik", eta argi utzi nahi izan zuen beretzat haur eta gazte literatura "katapulta bat" dela, bere adiera guztietan.
Yolanda Arrieta, Nerea Loiola eta Amaia Serrano izan da lehiaketako epaimahaia osatu duen hirukoa. Loiola kenduta, beste biak Modelon izan ziren, eta Agirreren lanak dituen ezaugarriak baloratu zituzten. Bide batez, jakitera eman zuten hiru kideak berehala jarri zirela ados saria emateko orduan; izan ere, irakurri zituzten 21 lanen artean, hiruren lan kuttunena Euri eta ateri izan zelako hasieratik.
Jarraian, sari banaketarekin hasi ziren. Lehenik eta behin, Zarauzko Udalak irabazleari eginiko elkarrizketaren ikus-entzunezkoa eman zuten pantaila handian. Ondoren, Gabilondok ongi azaldu bezala, Jose Luis Zumetak Manolo Urbietaren omenezko Bakarrik eta libre diskorako eginiko margolaren erreplika oparitu zioten Agirreri; Garzesen eskutik jaso zuen, gainera. Idazle bermeotarra eskertuta agertu zen, eta bere lehen Lizardi Saritik bigarrenerako jauzian edo zubian sortu diren sormen gorabeherak kontatu zituen.
Nolanahi ere, hasiera-hasieratik azpimarra berezia egin nahi izan zion atzoko egunari: Haur eta Gazte Literaturaren Nazioarteko Eguna izateaz gain, Autismoaren Nazioarteko Eguna ere bazelako. "Ipuinean hala azaltzen ez badut ere, kontakizuneko protagonista autista da", aitortu zuen jendaurrean. Gauzak horrela, bigarren irakurraldi bat mereziko du orain idazlearen benetako intentzioa zein den jakinda. Elkar argitaletxeak eman du argitara, eta Yolanda Mosquerak egin ditu ilustrazioak.
Bukatzeko, 44. Lizardi Sariko oinarrien berri eman zituzten; edizio berriak gazte literaturara bideratutako lanak onartuko ditu. Kultura zinegotzi Irune Urbietak Agirre zoriontzeaz gain, eskerrak eman zizkion "horren ipuin ederra oparitzeagatik", eta bide batez, 44. edizioan parte hartzera animatu zuen jendea.