Zarauzko aisialdi eskaintza DBHko ikasleentzat bideratu eta horiengan mendiarekiko zaletasuna sustatzeko asmotan sortu berri dute hainbat zarauztar gaztek Bugi Bugi gazteentzako aisialdi taldea. Libe Agirre (Zarautz, 2001) eta Aratz Mujika (Zarautz, 2005) dira taldeko kideetako bi, eta proiektua orain gutxi aurkeztu badute ere, aspalditik ari dira hori eratzeko bidean; duela bi urtetik, gutxi gorabehera. "Haur Kultur Taldean ibiltzen garen begiraleetako asko beste talde batzuetan ere ibiltzen gara, eta umeen danborradan ere parte hartzen dugunez, hori amaitu osteko poteo batean atera zen talde hau sortzeko ideia", dio Agirrek.
Asmoa "behin eta berriz" mahaigaineratzen zutela nabaritu zuten aurrerago, eta orduan hasi ziren proiektuari forma ematen. "Hitz egiten genuenean nabaritzen zen gogoa genuela, eta horregatik erabaki genuen prozesuarekin hastea. Haur Kultur Taldeko zaharrenek ere asko animatu gintuzten horretara", azaldu du Mujikak. Hasieran, Gaztelekuan elkartzen ziren, eta gerora eskuratu zuten gaur egun bilerak egiten dituzten Vista Alegreko auzo elkarteko gela.
Bi kideek gehitu dutenez, DBHko gazteentzat ekintzak egiten badira ere, haiei orain arte herrian izan ez duten aukera ematea da asmoa. Zehazki, mendiarekiko zaletasuna eta inguruko lekuak ezagutzeko interesa sustatu nahi dituzte. Gainera, euren webgunean azpimarratu dutenez, teknologiarekin oso lotuta dago aisialdia, euskararekiko erakarpena ere "ez da nahikoa" eta, kirolaz harago, "eskolaz kanpoko harremanak ez dira gehiegi sakontzen". Gainera, aurrekoei gehitzeko beste ideia bat ere azaldu du Mujikak: "Askotan gertatzen da, lotsa tarteko, gazte batzuk ez direla ausartzen Txipistrineko nahiz Gurutxurtuko ekintzetara joaten, horietan parte hartzen dutenek euren taldeak jada osatuta dituztelako".
Bada, errealitate hori aldatzeko helburuz eratu dute elkartea, eta horri jarri dioten izenak ere badu bere arrazoia. Izen erakargarri bat nahi zuten, mugimenduarekin lotua, dibertigarria, alaia, eta denak Pirritx eta Porrotxen "frikiak" direnez, Bugi Bugi bururatu zitzaien: "Abesti ezagunaren izena atera zen, eta denoi gustatu zitzaigun; beraz, izen horrekin geratu ginen", gehitu dute bi kideek.
Abuzturako plana
Elkartea aurkeztearekin batera jakinarazi du taldeak bere lehen ekintza ere. Zehazki, abuztuaren 1etik 10era bost eguneko mendiz mendiko ibilaldia eta beste bost eguneko egonaldia antolatu dituzte, "udaleku misto" bezala definitu dituztenak. Zehazki, lehen egunetan Zarautzen hasi eta Indamendi, Aizarna, Sañoa, Azpeitia, Inda, Gazume eta Hernio ezagutuko dituzte oinez, eta frontoi nahiz mendietan egingo dituzte ekintza guztiak: lo, jolasak, otorduak... Amaieran Beizamara iritsiko dira, azken bost egunak bertako aterpetxean igarotzeko. "Guri ere asko gustatzen zaigu mendia, eta horrelako zerbait antolatzea oso ideia polita iruditu zitzaigun", dio Mujikak.
Mendizaletasunak eta beste gauza askok elkartzen dituzte elkartea osatzen duten gazteak, eta egun 11 kide direla adierazi dute. Batzuk lanean eta beste batzuk ikasten ari dira, eta denek maila bereko inplikazioa izatea "ezinezkoa" dela azaldu badute ere, elkarren artean "oso ondo" moldatzen direla diote Agirrek eta Mujikak. "Gu boluntarioak gara, ez dugu hau egiteagatik ezer irabazten, eta bestelako lanak ere baditugunez, ahal duguna eskaintzen diogu taldeari. Horretaz gain, asko babesten gara elkar".
Gainera, ardurak beren artean banatzen dituztela diote, "bakoitza hobeto moldatzen den diziplinaren arabera". Adibideak ere jarri dituzte. "Iñaki, adibidez, gure informatikaria da, eta berak egin du webgunea. Anderrek soinu teknikari lanak egiten ditu beharrezko momentuetan, eta daukagun bozgorailua ere berak lortu zuen. Denok genuen aurretik harremana aisialdi taldeekin, eta gure alea jartzen saiatzen gara". Hala eta guztiz ere, hamaikakoaz gain, Agirrek eta Mujikak ez dute ahaztu nahi izan jaso duten bestelako laguntzaz. "Berriro diogu, baina Haur Kultur Taldeko zaharrak beti egon dira hor, bai elkartea sortzerakoan genituen zalantzak argitzeko, bai gaur egun ere", dio Agirrek. Mujikak gehitu duenez, baina, hori horrela izatea ez da salbuespena, Zarautzen aisialdi eskaintzaz arduratzen diren taldeak "asko" laguntzen baitira elkar. Horretaz gain, horietan guztietan dauden boluntario sareen garrantziaz hitz egin dute bi kideek: "Jendeak begirale lana ordainpeko zerbait bezala ulertzen du, baina Zarautzen desberdina da egoera, eta hori ez du jende askok ulertzen".
Bugi Bugi sortu berri duten taldea bada ere, gogoa ez zaie falta kide guztiei. Oraindik ez dute azaldu gerora zer ekintza egingo dituzten; momentuz antolatu dituzten udalekuetan jarri nahi dituzte indarrak, "gauzak pixkanaka eta ondo" egiteko asmoarekin. "Eta edozeinek gure proiektua lagundu nahi badu, besoak zabalik hartuko dugu", esan dute.