Etxegiro proiektuaren ekimenez, Saguxar taldeak zuzeneko emanaldia eskainiko du ostegunean Hiruputzu gaztetxean. 19:00etatik aurrera gozatu ahal izango da kontzertuaz, jan-edanerako aukerarekin, eta sarrerak unean bertan erosi ahal izango dira, lau euroan.
Etxegiro lagun talde batek abiatutako proiektu berria da, "bakarlariei espazio bat emateko helburuarekin" sortua. Antolatzaileen esanetan, "edonork" parte hartu ahal izango du, eta asmoa da zenbait ostegunetan kontzertuak antolatzea, Hiruputzun "giro leun bat" sortuz. Gainera, pintxo "landuak" dastatzeko aukera ere izango da bertan, borondatearen truke.
"Arreta kontzertuetara zuzentzeko eskatuko dugu, proposamen musikal hauek lerro artean irakurri behar baitira", nabarmendu dute Etxegiroko kideek. Hain zuzen ere, gonbidatzen dituzten artistei eta beraien proposamenei eman nahi diete garrantzia.
Artista irundarra da Saguxar, eta Sei Mila Urte izeneko EP-a kaleratu zuen 2024ko urrian. Artistak berak ekoitzitako diskoa da, eta hilabete gutxietan musikazale eta digger ezberdinen arreta deitu du.