World Surf League elkarteak baieztatu duenez, Nadia Erostarbe surflaria WCTko El Salvador Pro txapelketan lehiatuko da, eta baita Australian egingo diren ondorengo hiru probetan ere. Tatiana Weston-Webb surflari brasildarrak behin-behinean utzi du zirkuitua, buru-osasuna zaintzeko, eta haren lekua hartuko du Erostarbek. Berez, Johanne Defay surflariaren haurdunaldia dela eta, haren bajaren zain zegoen, baina orain ez du faktore horren mende egon beharko.
El Salvador Pro txapelketa bihar hasiko da eta apirilaren 12ra arte luzatuko da. Zarauztarrak lehen kanporaketako lehen txanda ariko da, eta Molly Picklum australiarra –bigarrena sailkapen orokorrean– eta Bella Kenworthy estatubatuarra izango ditu lehiakide. Jarraian, Australiako hiru hitzorduak etorriko dira segidan: Rip Curl Pro Bells Beach (Victoria), apirilaren 18tik 28ra; Bonsoy Gold Coast Pro (Queensland), maiatzaren 3tik 13ra; eta Western Australia Margaret River Pro (Western Australia), maiatzaren 17tik 27ra.
Hawaiiko Lexus Pipe Pro proban parte hartu ondoren, WCT denboraldiko bi proba baino ez ditu galdu, eta bere esku dago denboraldi erdiko etena baino lehen hamar onenen artean sailkatzea, datorren denboraldirako postua eutsi ahal izateko. Une honetan, hemezortzigarren tokian dago kokatuta.