Horma irudi berezia jarri berri dute Zarauzko tren geltoki berriaren azpiko pasagunean; atzo bertan kokatu eta aurkeztu zuen Zarauzko Udalak. Jose Ignazio Treku artista debarrak (Gipuzkoa) margotu du, bi margolari zarauztarrekin batera: Joxe Mari Iruretagoienarekin eta Joxe Mari Zabalegirekin, hain zuzen. "Hiru artistek azken hilabeteak eman dituzte Santa Klara komentuko areto batean guztia prestatzen, eta gaur [atzo] aurkezten dugu, nire iritziz, ikusgarri eta zoragarri geratu den mural hau", aditzera eman zuen Xabier Txurruka alkateak atzo eguerdiko agerraldian.
Trena herrira noiz iritsi zen islatu nahi izan dute hiru artistek obra erraldoiarekin; izan ere, zazpi metroko luzera eta 2,10 metroko altuera ditu. Bertan, margolan nagusi bat nabarmentzen da, 1920ko geltokia irudikatzen duena; orain gutxira arte ezagutu den eraikuntzaren estilokoa. Baina margolan horren barruan, ezkerrean eta goian, 1905eko lehendabiziko geralekuaren aparteko margolantxo bat ere egin dute.
'Belle époque'
Sorrerako tren geltoki hura haizete batek eraman zuela aditzera eman zuen Iruretagoienak, eskuizkribuetan jartzen duenaren arabera. Obra nagusia eta sasoi hura testuinguruan jartzeko, belle époque garaiko jantziekin ageri da jendea, eta lokomotor beltz handi batek hartzen du horma irudiaren epizentroa. Lumiere anaien XIX. mendeko film hura oroit, badirudi margolanetik aterako dela.
"Baporezko trenak ziren haiek, urez eta ikatzez funtzionatzen zuten lokomotor zaharrak. Erraldoiak ziren, eta 1926 ingurura arte egon ziren erabilgarri, elektrizitatez ibiltzen zirenak ekarri zituzten arte. Izan zen biek bat egin zuten garai bat ere", kontatu zuen Iruretagoienak.
Horma irudia gauzatzeko enkargua Zarauzko Udalak egin zion Trekuri, eta debarrak bere bi lankideekin egiteko eskaera egin zuen; erakundeak begi onez ikusi zuen proposamena. Halaxe ekin zioten prozesuari, eta Txurrukak aitortu zuen asmatu dutela "bai formatuarekin, bai formularekin".
Hiru eskutara margotzea ez da gauza erraza, baina ongi moldatu direla adierazi zuten hiru lagunek. "Aspalditik ezagutzen dugu elkar. Koloreekin arazorik ez dugu. Trazuari dagokionez, pixka bat ezberdina dugu. Azken finean, bakoitzak bere nortasuna eta perspektiba ditu, eta solasaldiak izaten ditugu, baina haserrealdirik eta halakorik ez. Ondo pasatu dugu".
Herritarren «gustagarri»
Pare bat hilabetetan gauzatu du obra hirukoteak; astean behin eta batzuetan bitan elkartzen ziren pintzela dantzan jartzeko. "Beste aukerarik ez genuen, eta horregatik luzatu zaigu pixka bat". Orain, jada, badu erakusleiho zabal eta irekia horma irudiak, eta herritarren "gustagarri" izango dela iritzi zion Iruretagoienak. "Garai bateko Zarautz da, eta uste dut herri guztiek zaindu behar dituztela beren sustraiak, nondik gatozen ikusteko". Alde modernoa eta antzinakoa uztartu dituzte horretarako, nolabait.
"Jendea azpibidetik igaro ahala geratu egiten da zer dagoen ikustera, eta herritar guztiak gonbidatzen ditut margolanaz gozatzera. Izan ere, nahita dago kokapen honetan jarrita, Zarauzko geltoki zaharra irudikatu dutelako. Baina, dudarik gabe, estrategikoki dago pentsatuta eta ezarrita tren geltoki berriaren sarreraren parean; horma janzteaz gain, bizia emateko pasaguneari", zehaztu zuen alkateak.
Halaber, herritar guztien izenean eskerrak eman zizkien hiru artistei, "gustu eta kariño handiz" egindako lana ondu dutelako. "Gauzak gogoz egiten direnean, bistakoa izaten da emaitza. Oso eskuzabalak izan zarete Zarautzekin mural hau egiterakoan, guretzat opari handi bat baita".