Efe albiste agentziak jakinarazi duenez, 2021eko maiatzean gizon batek emakume bat bortxatu zuen Zarautzen, eta joan den azaroan egin zen epaiketa Gipuzkoako Auzitegiko Lehen Sekzioan. Han, Fiskaltzak eta akusazio partikularrak zazpi urteko kartzela zigorra eskatu zuten auzipetuarentzat. Defentsak, berriz, absoluzioa eskatu zuen, argudiatuz sexu harremana egon zela, baina hori biek adostutakoa izan zela.
Orain atera da epaia, eta auzitegiak lau urte eta erdiko espetxe zigorra ezarri dio akusatuari. Kartzela zigorraz gain, zigortuak emakumeari 5.160 euro eman beharko dizkio kalte moralengatik eta kalte pertsonalengatik. Halaber, bost urte eta erdiz biktimarengana hurbiltzea eta harekin harremanetan jartzea galarazi dio, eta bost urteko zaintzapeko askatasun neurria ezarri dio.
Defentsak Euskal Autonomia Erkidegoko Auzitegi Nagusian (EAEan) helegitea jarriko duela iragarri du.