Indartsu itzuli da Zarauzko Triatloia bi urteko etenaren ondoren. Antonio Benito eta Helene Alberdi izan dira distantzia erdiko triatloi entzutetsua amaitzen lehenak gaurkoan, eta haien atzetik heldu dira David McNamee eta Leon Chevalier gizonezkoetan, eta Judith Corachan eta Justine Guerard emakumezkoetan.
Podiumean sartzea espero zuen arren, 2019ko garaile Corachanen aurretik geratzea ez zuen inondik inora espero Alberdi zumaiarrak. Igeriketa probaren amaieratik buruan izan da zumaiarra, eta Corachan eta Guerard une oro oso gertutik jarraika izan baditu ere, ez dute Alberdi aurreratzerik lortu. Hunkituta agertu da zumaiarra helmugan, eta Zarauzko Triatloia irabazita "txikitako ametsa" bete duela azaldu du.
Gizonezkoetan estuagoa izan da lehia. Francesc Godoy izan da lehena uretatik ateratzen, baina txirrindularitza proban Chevalier izan da nagusi, McNamee atzetik zuela. Korrikako proban Antonio Benitok guztiak aurreratzea lortu du, eta espainiarra izan da helmugaratzen lehena.
Lehenengo zarauztarra, berriz, Iñigo Eizagirre izan da. Gutxi gorabehera aurreikusitako denboran amaitu du proba zarauztarrak, eta lanak gustura egin dituela adierazi dio Urolakosta.hitza.eus-i.
Lotura hauetan daude ikusgai triatloiko argazki galeriak: