2021erako 36 milioi euroko aurrekontua izango du Zarauzko Udalak. Hala onartu zuen udalbatzak atzoko ezohiko bilkuran. Udal Gobernuko taldeen (EAJ eta PSE-EE) aldeko botoekin egin zuen aurrera aurrekontu proposamenak; Podemos Equo-Berdeak abstenitu egin zen, eta aurka agertu zen EH Bildu.
Zehazki, 36.202.261 euroko aurrekontua izango du udalak 2021. urterako. Jesus Arana EAJko bozeramaileak eman zuen proposamenaren berri. Azaldu zuen jakitun zirela COVIDak "zuzenean eta gogor eragiten" jarraituko duela 2021ean ere, gutxienez, lehen sei edo bederatzi hilabeteetan.
36 milioi horietatik hamazazpi aldundiko Foru Funtsetik jaso dituztela zehaztu du Aranak, eta zuzeneko zerga bidez jaso dituztela ia zortzi milioi. Bestelako zerga eta iturrietatik osatu dute 36 milioiko aurrekontua.
Gastuei dagokienean, udalaren pertsonal gastuetara bideratuko dituzte 12.400.000 euro, eta inbertsioetarako, berriz, 2.171.000ko partida bideratuko dute. Inbertsio horien artean egongo dira, besteak beste, Maria Inmaculada ikastetxea zen eraikina erosten jarraitzea (374.000 euro), Orokietako patioa estaltzea (300.000 euro), Abendañoko lokalen egokitzapena (150.000) eta herriko semaforoen berritze eta mantentze lanak.
Gastu politikoari dagokionez, Aranak nabarmendu du aurtengo aurrekontuan garrantzia berezia dutela Gizarte Zerbitzuek eta gizarte sustapenak. Hain Zuzen ere, Gizarte Zerbitzuetara 4.400.000 euro bideratuko dituzte. "Horrek esan nahi du zarauztar bakoitzeko 181 euro bideratzen dituela aurrekontu honek", ñabartu du EAJko bozeramaileak. Horren atzetik, Kulturara 4.200.000 euro bideratuko dutela zehaztu du, eta antzeko koprua Etxebizitza, Hirigintzara eta herri lanetara. 4 milioi euro bideratuko dituzte, baita ere, herritarren segurtasun eta mugikortasunera, eta Kirol Sailera, berriz, 3.100.000 euro inguru.
Aurrekontua diseinatzerako orduan "zarauztarrei erantzuteko zerbitzuak mantentzea eta inbertsio publikoari eustea" kontuan hartu dutela ere zehaztu du zinegotziak.
Boto partikularra eta iruzkinak
Podemos Equo-Berdeak udal taldeak boto partikularra aurkeztu zuen Udal Gobernuak proposatutako aurrekontuaren aurrean. Zehazki, proposatu zuen gutxienez %10 jaistea zinegotzi guztien soldata, eta aurrezki hori berbideratzea Gizarte Zerbitzuetara, baina eskaerak ez zuen gainontzeko taldeen babesik jaso
EH Bilduk ez zuen banakako zuzenketarik aurkeztu, baina Itziar Murua bozeramaileak udalbatzarrean zerrendatu zituen koalizioak proposamenari egindako iruzkinak. Azaldu zuen faltan bota zutela aurrekontuan Zarauzko energia kontsumoaren diagnosirako partida, baita Neguetxea edo neguko harrera zentroa ere. "Gipuzkoako mapa sozialak dio eskualdearen erantzukizuna dela bazterketa egoeran daudenentzat gau eta eguneko zentro bat izatea, eta ez dago horrelakorik", esan zuen Muruak. Horiez gain, besteak beste, kritikatu zuen nekazaritzaren sustapenerako partida Turismo Sailera aldatu izana.