Atzo, ostirala, su hartu zuen Bizkaia kaleko lokal batek, Eroski hipermerkatuaren inguruan. Ertzaintzak UROLA KOSTAKO HITZAri jakinarazi dionez, 20:00ak inguruan izan zen sutea, oraindik argitu gabeko arrazoiak medio. Une horretan ez zegoen inor barruan; hala, kea irteten hasi arte, ez zen inor jabetu gertatuaz.
Errentan hartutako hainbat espazio daude eremu horretan. Sutea gertatu zen tokia hutsik egon arren, ondoko lokal batean zegoen pertsona batek kea arnastu zuen, eta zorabioak izan zituen. Beraz, Donostiako ospitalera eraman zuten, bertan artatua izan zedin.