Hodei Iruretagoiena 'Izeta IV'.ak onartu du Goikoetxek botatako erronka

Izeta IV.a. Atzo itxi zuten erronkarako tratua Hodei Iruretagoiena Izeta IV.a eta Imanol Albizu Goikoetxe harri-jasotzaileek. Azpeitiko Mendizabal erretegian elkartu ziren, Goikoetxek botatako erronkaz hitz egiteko, eta akordiora iritsi ziren: maiatzaren 4an Azpeitiko zezen plazan egingo dute apustua bi harri-jasotzaileek. Desafioan 125 kiloko kubikoarekin hamar minutuko hiru txanda egitea proposatu zion Goikoetxek Izeta IV.ari, eta halaxe egingo dute; izan ere, bi kirolariek ez zuten lan handirik izan atzokoan desafioa adosteko. Goikoetxe elgoibartar harri-jasotzaileak joan zen urtarrilaren 6an bota zion erronka Zarauzko Izeta IV.ari, Euskadi Irratiko Hiru Erregeen Mahaia kirol saioan. Goikoetxek apirilean nahi zuen apustua egitea, baina maiatzean egitea adostu zuten atzo.