"Arduraz aritu gara, ezin genuen abuztuan Zarautz udaltzainbururik gabe utzi"

zarauzkohitza.eus Aktualitatea. 2018ko irailaren 3a

https://vimeo.com/287629821

Xabier Txurruka alkateak HITZAri baieztatu egin dio atzo zenbait komunikabidetan argitaratutako albistea. Alegia, Zarauzko udaltzainburuaren izendapena anulatzen duen sententzia berretsi egin duela EAEko Justizia Auzitegi Nagusiak. Ostegunean Udalbatzak aho batez erabaki zuen lanpostu hori barne sustapen bidez betetzea.

EAEko Justizia Auzitegi Nagusiak ekainean berretsi zuen aurrez Donostiako 3 zenbakiko Administrazio Auzien Epaitegiak emandako sententzia bat. Hark bertan behera utzi zuen Zarauzko udaltzainburuaren izendapena. Besteak beste, udalak ez zuen prozedura legala bete eta ez zuen lehiaketa publikorik deitu. Bederatzi urte zeramatzan postu horretan udaltzainburuak. Zarauzko Udalari ekainean jakinarazi zion erabakia EAEko Justizia Auzitegi Nagusiak, baina udalak ez zuen neurririk hartu. Xabier Txurruka alkateak HITZAri azaldu dio arrazoia. "Arduraz aritu gara, ezin genuen abuztuan Zarautz udaltzainbururik gabe utzi".

Ordezkoa, barne sustapen bidez

Udalak epe bat dauka sententzia betetzeko, eta epe hori amaitu aurretik oposaketak egin eta udaltzainburu berria aukeratu nahi du. Horretarako barne sustapena egingo du; hau da, udal langileek izango dute aukera lanpostu hori betetzeko. Joan den osteguneko udalbatzarrean eman zituzten horren inguruko azalpenak. Hala, barne sustapena egitea erabaki zuten langileen ordezkarien eta arduradun politikoen oniritziarekin. Udalbatzak ere aho batez onartu zuen proposamena, alderdi guztien aldeko botoekin.

Gizartea Zarautz

Gukak zu bezalako irakurleen babesa behar du tokiko informazioa euskaraz eta modu profesionalean lantzen jarraitzeko.

Izan Gukakide