Zarauzko kiroldegiko ikasgela zabalduko dute asteartean

Ikasleak kiroldegiko ikasgelan (Zarauzko Udala). Aurreko ikasturtean erabiltzaileen aldetik jasotako harrera ona ikusita, neguko azterketa garairako Aritzbatalde kiroldegian egokitutako ikasgela berriz ere martxan jarriko du udalak. Datorren asteartean, hilaren 7an, zabalduko ditu ateak eta urtarrilaren 26a bitartean egongo da erabilgarri, eta 2001ean edo aurrez jaiotako ikasleek izango dute bertaratzeko aukera. Astelehenetik ostiralera egongo da zabalik, 06:15etik 21:30era, etenik gabe; larunbatetan, 08:00etatik 13:00etara eta 16:00etara 20:30era; eta igandetan, berriz, 09:00etara 13:00etara eta 16:00etatik 20:30era. Espaioa bideokamerekin kontrolatuta egongo da, eta ikasleek entxufeak nahiz wifia izango dituzte eskura. Aforoa kontrolatze aldera, erabiltzaileek liburutegiko txartela erakutsi beharko dute sarreran. Bestalde, kiroldegia itxita dagoen egunetan ikasgela ere itxi egingo da. Hala nola,  ondorengo egunetan: abenduaren 6, 8 eta 25ean eta urtarrilaren 1 eta 6an. Abenduaren 24an eta 31n, berriz, itxita egongo da arratsaldez.

Hobekuntzekin

Maiatzean proba moduan jarri zuten martxan kiroldegiko ikasgela, Sanz Enea liburutegia sasoi batzuetan txiki geratzen zela ikusita, eta batxilergo eta unibertsitateko ikasleei ikasteko beste gune bat eskaintzeko helburuarekin. Nekane Iribar Hezkuntza zinegotziak nabarmendu du ikasgelak erantzun ona izan duela, eta orain berriz ere abian jartzea erabaki dutela. Gainera, hobekuntzak izango izango dituela gaineratu du: "Argiztapena hobetuko dugu, eta berogailua jarriko dugu martxan. Bestalde, aretoak 85 pertsonako aforoa duen arren, 50 ikaslerentzat egokituta jarraituko du. Datorren azterketa garaian jasotako emaitzak aztertuko ditugu eta aforoa zabaltzeko beharra dagoen baloratuko dugu".