Itsas Zeharkaldiko lehen taldearen irteera, Getariako portutik (Aritz Mutiozabal).
Eguraldi eguzkitsua eta itsasoa baldintza egokietan zutela jokatu dute 47. Getaria-Zarautz Itsas Zeharkaldia. Ia 2.000 lagun uretaratu dira Getariako portutik, bost txandetan banatuta, eta Iñaki Salaberria irundarra eta Itxaso Alonso bilbotarra izan dira Zarauzko hondartzara iristen lehenak. Salaberriak, garaipena erdiesteaz gain, probako errekor berria egin du gizonezkoetan, 31:47ko denborarekin; Gorka Ripak 2006an ezarritako marka (32:05) ondu du. Bigarren postuan sailkatu da Haigor Aranguren donostiarra, eta hirugarren, berriz, Luis Goñi hernaniarra.
Emakumezkoetan errekorra gertu egon den arren, Alonso 35:24ko denboran osatu du proba, eta Irati Mendiaren markatik (35:18) 6 segundora geratu da. Bere atzetik Nerea Murua zarauztarra helmugaratu da bigarren postuan, eta Ana Vega donostiarra hirugarrenean; biak ala biak lehenak izan dira beren mailan: Murua Master2an eta Vega Master1ean.
Itxaso Alonso eta Iñaki Salaberria, Getaria-Zarautz Itsas Zeharkaldiko txapeldunak (Aritz Mutiozabal).
Muruak, era berean, Zarauzko lehen emakumezkoaren saria jaso du. Gizonezkoetan, Ander Zendoia izan da herriko bizkorrena. Getariako lehenek ere jaso dute saria: Iosu Iribarrek eta Izaskun Alvarezek. Bestalde, Alex Zabala zarauztarra, bere aldetik, gizonezkoen Master2 mailako irabazlea izan da, eta Rafael Zubeldia azpeitiarra hirugarrena; eta Orioko bizilagun Adriana Campoy bigarrena emakumezkoen Master2 mailak. Sari banaketa ekitaldiaren amaieran, zeharkaldiaren antolatzailea den Zarautz Balea igeriketa taldeak 1.500 euroko txekea eman dio Aspanogiri.
