Aurkeztu dute Zarauzko Euskal Asteko egitaraua

Xabier Txurruka eta Nekane Iribar, Euskal Astearen aurkezpenean (Amaia Ventas Aldabaldetreku). Aurten ere, ekitaldi ugari izango dira Euskal Astearen barruan, Turismo Bulegoak eta Jaiak eta ekitaldien sailak antolatuta. Ostegunean emango diote hasiera asteari, eta Euskal Jai Egunean amaituko da. Xabier Txurruka alkateak adierazi du zarauztarren "jai kuttuna" dela Euskal Jaia, "tradizio handikoa". Izan ere, 1924az geroztik antolatzen da. Hori kontuan izanda, deialdia egin die herritarrei zein bisitariei "ohitura zaharrei eutsi" eta "txukun jantzita etortzeko". Halaber, ahal den neurrian, herria txukun mantentzen saiatzeko eskatu du. Horretarako, udalak garbiketa zerbitzua indartuko du eta edukiontzi gehiago jarri. Era berean, nabarmendu du inongo eraso sexistarik ez dela onartuko, eta "jai alai eta baketsuak" izatea nahiko lukela. Beheko estekan ikus daiteke egitaraua.