Hilaren 19an amaituko da Zarauzko bertso paper sarira lanak aurkezteko epea

Parte-hartzaile bakoitzak nahi adina lan aurkez ditzake; Euskal Astean emango dute irabazlearen berri. Urtero legez, Zarauzko Udalak Basarri Bertsopaper Saria antolatu du euskara suspertu eta bertsogintza laguntzeko eta lanak uztailaren 19a bitartean aurkeztu ahalko dira Kultura sailean, Sanz Enea kultur etxean (Nafarroa kalea, 22).  Parte-hartzaile bakoitzak nahi adina lan aurkez ditzake, eta lan bakoitza, gutxienez ere, zortzi bertsoz osatuta egon beharko du. Sarira aurkeztutako bertso idatziak originalak, argitaratu gabeak eta beste inon saritu gabeak izan beharko dute. Lehiaketako bi lana onenak sarituko dituzte. Irabazleak 1.100 euro saria eta txapela jasoko du, eta txapeldunordeak 750 euro eta oroigarriak. Lanek behar adinako mailarik ez badute, sariak eman gabe gera daitezke. Epaimahaiak irailaren lehen astean emango du jakitera bere erabakia. Sariak Euskal Astean egin ohi den Bertsolari Gazteen Txapelketan banatuko dituzte. Aurkezteko modua Parte-hartzaileek hainbat ezaugarri eduki beharko dute kontuan lanak aurkezterakoan. Bertsoak makinaz idatzita bakarrik onartuko dituzte, bertsotik bertsora bi lerro zuri utzitan. Lan originala eta horren kopia bat aurkeztu beharko dute, izengoiti batekin sinatuta, eta egilearen datuak aparteko gutun azal itxi batean aurkeztuta; gutun azalaren kanpoaldean izengoitia idatziko da. Ez dituzte posta elektronikoz bidalitako lanak onartuko.