Herritarrek eta eragileek eramandako oihal zatiak elkarri josita, Patchwork erraldoia egin zuten atzo arratsaldean. 300 lagun inguru bildu ziren festa herrikoien aldeko ekitaldian, eta Skasti taldeak jarri zion musika banda.
Gurekin Jai festa batzordeak egindako deialdiari erantzun handia eman zioten herritarrek. Igande arratsaldez, Zarauzko malekoia, jostundegi erraldoia bilakatu zuen txosna batzordeak. Oihal zatiak josiz, patchwork erraldoia egitea zen helburua, eta ederki bete dute. Arratsaldea giro lasaian hasi zen arren, 18:00ak alderako 150 lagunetik gora ari ziren oihal zatiak elkarri josten. Koloretakoak, logotipodunak, eskuz margotuak, puntillak zituztenak… Denetariko oihal zatiak eta adabakiak ekarri zituen jendeak. Lehenbizi, taldetxotan jarrita hasi ziren josten, eta gero, zati guztiak elkarri lotu zizkioten.
Azkenerako, metro koadro ugariko oihal koloretsua egin zuten, eta aurtengo sanpelaioetan oholtza dotoretzeko erabiliko dute. Haurrak, gazteak eta helduak elkarrekin aritu ziren josten, Skasti musika talde zarauztarrak giroa berotu zuen bitartean. Arratsaldeak aurrera egin ahala, ikusmina areagotu egin zuten musikak eta mugimenduak; hala, jende ugari erakarri zuen malekoiko ekitaldiak. Bukaeran, argazki erraldoia ateratzeko bildu ziren guztiak, eta 300 lagun inguru jarri ziren patchorkaren bueltan.
Gurekin Jai festa batzordeak “oso balorazio positiboa” egin du sormen ekitaldi honen amaieran: “Herrigintza josi dugu ekimen honekin. Borondate eta ekimen txiki asko dituen herria da gurea, eta guztiak elkarri josita, herri bizia eta koloretsua eraikitzeko ahalmena dugula adierazi nahi genuen. Herritarrek eta eragileek modu ikusgarrian erantzun dute, eta orain guri dagokigu erakutsitako babes hori eskertzea.”
Esker-ona adierazteko, Gurekin Jaik, “sekulako festak” antolatu dituela jakinarazi du Gurekin Jaik. Dagoeneko hasi dira ekainaren 24tik 27rako egitarauaren kartelak jartzen. Malekoian jarriko dituzte txosnak, Duke Enea parean, eta herritar guztiei bertara joateko gonbidapena egin diete.
Iaz ere, txosnen aldeko “herri olatua” sortzeko egin zuten beste ekimen bat. Orduan, libdub herrikoia antolatu zuten, eta jendetza bildu zuten, herritarren aldarrikapenak dantzan jarriz.