Eskubide guztien alde, ilegalizaziorik ez! lelopean elkarretaratzeak deitu dituzte. Bihar izango dira protestak Bilduren zerrenda guztiak baliogabetu dituztela salatzeko. Espainiako Auzitegi Gorenak hartutako erabakiaren kontra jarri dituzte hitzorduak eskualdean ere. Hala, Zarautzen 19:30ean izango da bilkura udaletxe aurrean.
Espainiako Auzitegi Gorenak baliogabetu egin ditu Bilduren zerrenda guztiak, eta alderdi sortu berriaren Zarauzko ordezkariek gaitzetsi egin dute erabakia.
Duela egun batzuk aurkeztu zuten taldea, prentsaurrekoan, zera adieraziz: “Gaur eta hemen jende multzo bat Bildu gara. Gutariko bakoitza adin, auzo, kultura politiko eta ideologia ezberdinekoa da, baina denok dugu abiapuntu eta helburu bera. Geure ezberdintasunak gainditu eta batzen gaituenetik egin nahi dugu politika Zarautzen. Horretarako, ilusioa eta borondatea geure bitarteko nagusi gisara hartuz hautagaitza anitz eta ezberdina egin dugu”.
Unearen egokitasuna nabarmendu zuten: “Gaur inoiz ez bezalako ilusioa sortu da gure herrian bakegintzaren gainean. Uste dugu konponbidea topatzeko garaia dela, behar den moduan, elkarrizketaren bidez, denon arteko adostasunez aurrera egiteko”.
Udala lan tresna izango dutela esan dute, eta udal funtzionamenduan parte hartu ez arren, Zarauzko Udalak egindako lana “zorrotz” jarraitu dutela nabarmendu: “Tradizio politikorik ez dugu, baina horregatik ez gara ezgauza: inork baino borondate eta gogo handiagoa dugu lanerako eta talde oso ona osatzen dugu Bilduren zerrendetan goazenok”.
Epaileen bozketa 9-6 geratu da. Gehiengoaren ustez, Batasunak zuzendu eta kontrolatu du Bildu. “Polo subiranista sortzeko ideia EArena da”, esan dute aldeko sei epaileek, eta Gorenaren erabakiari “konstituzionalki eta legalki ezin zaio eutsi”. Bilduk iragarri du Auzitegi Konstituzionalera joko duela; bi egun ditu helegitea aurkezteko eta Konstituzionalak ostegun gauerdirako hartuko du.
EAKo buru Pello Urizarrek “iruzurtzat” jo du gertatutakoa. Konstituzionalera joko dutela berretsi du Bilduk, eta, behar izanez gero Europara, hauteskundeak baliogabetzeko eskatzeko.
Hona hemen Zarauzko Bildu osatzen duten hautagaiak:
1. Juan Luis Illarramendi Roteta
2. Eider Illarramendi Azkue
3. Jabier Etxaburu Elu
4. Karmele Alberdi Linazasoro
5. Iñaki Eizagirre Eizagirre
6. Alizia Osa Otxandorena
7. Mikel Goenaga Guria
8. Ane Eizmendi Alberdi
9. Gari Berasaluze Ostolaza
10. Ibai Etxabe Roman
11. Gurutze Ostolaza Amilibia
12. Antonio Eizmendi Aristi
13. Ekai Tolosa Sarasola
14. Teresa Aldai Eizagirre
15. Eneritz Garmendia Iturria
16. Eneko Alberdi Gisasola
17. Mikel Troitiño Berasategi
18. Maritxu Uria Eizagirre
19. Conchi Mendez Aranzeta
20. Hodei Iruretagoiena Albizu
21. Asier Aldalur Zulaika
Ordezkoak:
22. Milagros Unanue Gastesi
23. Iñaki Irure Gorostegi
24. Benito Beitia Goenaga