Bitik bi bandera eskuratu dituzte gaur Orioko arraunlariek Lekeition (Bizkaia). Lekeitioko Ikurrina traineru estropadak jokatu dituzte goizean zehar, eta bai gizonezkoetan bai emakumezkoetan Orio izan da txapelduna. Emakumezkoetan, gainera, lehenengo bandera du Oriok aurtengo denboraldian. Oriokoez gain, Zumaiako eta Zarauzko gizonezkoen zein emakumezkoen traineruak lehiatu dira bertan. Eguraldia ez da oso txukuna izan gaurko jardunaldian, eta txanda batetik bestera nabaritu egin dira haizearen aldaketak.
Emakumezkoei dagokienez, bi luze eta ziaboga bat egin behar izan dituzte estropadan, eta bi txandatan banatuta jokatu dute. Xanti Zabaletak zuzentzen duen taldea hasiera-hasieratik jarri da estropadako buru, eta ziaboga txukun eginda, nagusitasunez irabaztea lortu du. 11 minutu eta 58 segundo behar izan ditu lanak amaitzeko, eta bigarren sailkatu da Hibaika, 12 minutu eta 12 segundoan, txapelduna baino hamalau segundo beranduago, alegia.
Hirugarren azkarrena izan da Zumaia, 12 minutu eta 18 segundora zeharkatu baitu helmuga. Zarautzek, berriz, bosgarren amaitu du gaurko estropada (13:09,00), eta haren aurretik heldu da Tolosaldea (12:21,00). Gainerakoei dagokienez, Kaiku sailkatu da seigarren (13:09,30), Hondarribia zazpigarren (13:18,13), Deustu zortzigarren (13:25,34), Isuntza bederatzigarren (13:29,55) eta Portugalete hamargarren (15:43,00).
Orioko gizonezkoak ere txapeldun
Gizonezkoen kasuan, hiru txandatan uretaratu dira, eta lau luze eta hiru ziaboga burutu behar izan dituzte. Orioko gizonezkoen trainerua izan da jaun eta jabe bertan: 21:45,27ko denboran amaitu ditu lanak, eta bigarren izan den San Juani bederatzi segundoko tartea atera dio (21:54,40).
Hirugarren zeharkatu du helmuga Zarautzek (21:56,00), eta laugarren eta bosgarren postuak Isuntzarentzat (21:58,51) eta Ondarroarentzat (22:08,78) izan dira, hurrenez hurren. Deustuk egin du seigarren (22:28,00), eta zazpigarren helmugaratu da Zumaia (22:36,00).
Gainerakoan, honela geratu da sailkapena: Kaiku zortzigarren (22:40,00), Busturialdea bederatzigarren (23:05,25), Hondarribia hamargarren (23:06,19), Portugalete hamaikagarren (23:33,00), Hibaika hamabigarren 23:33,05), Arkote hamahirugarren (23:34,57), Deustu B hamalaugarren (24:21,93), eta Mutriku hamabosgarren (25:53,37).
