Donibane Lohizunen (Lapurdi) jokatu zuten atzo Gipuzkoako batel ligako zazpigarren jardunaldia. 15:30etik aurrera aritu ziren ontziak lehian, eta eskualdeko taldeek askotariko emaitzak lortu zituzten.
Orioko Arraunketa Elkarteko taldeek lan ona egin zuten, bereziki infantil mailako mutilek: lehenengo sailkatu zen Orio A taldea, eta bigarren Orio B. Maila horretan, sailkapenaren hirugarren postuan helmugaratzea lortu zuten Getariako neskek.
Promesa mutiletan, halaber, garaipena lortu zuen Orio A-k, eta maila horretako Zumaiaren talde mistoak hirugarren egin zuen. Zarauzko taldeen artean, promesa mailako mutilek erdietsi zuten emaitza onena: bosgarren postuan helmugaratzea lortu zuten.
Traineruetan, Orio eta Getaria aurretik
Eskualdeko beteranoek, emakumeek eta gizonezkoek Hondarribian (Gipuzkoa) izan dute asteburu honetako hitzordua: Hondarribiako XXVI. Traineru Jaitsiera. Beteranoetan, Orio A taldeak helmuga lehenengo postuan zeharkatzea lortu zuen, eta hirugarren egin zuen gizonezkoen mailako Getariako traineruak. Emakumezkoen artean, Zarauzko eta Zumaiako taldeak izan ziren eskualdeko ordezkari bakarrak, eta hurrenez hurren, azken-aurrenak eta azkenak izan ziren helmugaratzen.