Huhezinema jaialdiko hiru sari jaso zituzten atzo Deñe Garcia Bravo urrestildarrak eta Eire Maya zumaiarrak. Bakoitzak bere arloan, ondu dituzten ikus-entzunezko lanei esker eskuratu zituzten horiek epaimahaiaren aitortzak. Atzo jaso zituzten sariak Aretxabaletako (Gipuzkoa) Arkupe aretoan egindako ekitaldian.
Deñe Garcia Bravo urrestildarrak eta Mikel Balerdik bi sari jaso zituzten sari banaketa ekitaldian, Olaberrian (Gipuzkoa) 1936ko gerra piztu berritan fusilatu zituzten bi lagunen historiatik abiatuta ondutako Eraman zutela dokumentalari esker. Sail ofizialean finalisten artean izan da lan hori, eta hain zuzen ere, Ikusleen saria eta epaimahaiaren Huhezinema saria eskuratu dituzte bi sortzaileek.
Eire Maya sortzaile eta musikari zumaiarrak Ikasle saria jaso zuen, ostera, atzokoan. Ikus-entzunezko komunikazioko ikasleak Zeharkatzen gaituena film laburrari esker eskuratu du saria.
Huhezik, Mondragon Unibertsitateko Humanitate eta Hezkuntza Zientzien fakultateak, 2008an jarri zuen martxan Huhezinema jaialdia. Harrezkero, urtez urte egin dute egitasmoa; aurtengoa 19. edizioa izan da.