Aizkolaritza eta harri jasotzea uztartzen dituen Kirol Herri txapelketa azken txanpan sartu da, eta bihar arratsaldean banakako finalak jokatuko dituzte. Urte amaieran Asteasun egin ohi den herri kirol jaialdiaren barruan izango dira norgehiagokak, 17:00etan hasita, Usarrabi pilotalekuan.
Harriarekin hainbat zarauztar ariko dira lehian. Gizonezkoetan, Mikel Lopetegi Urra-k Jon Gisasola Zelai V, Beñat Telleria eta Gari Garmendia izango ditu aurkari, eta egin beharreko lanak ondorengoak: 125 kiloko kubikoa, 125 kiloko zilindrikoa eta 125 kiloko esferikoa ahalik eta gehien altxatzen saiatuko dira, harri bakoitzareko bi minutuko txandak eginez.
Emakumezkoetan, lau lehiakideetatik lau dira zarauztarrak: Ainitze Zumeta, Lierni Osa eta Maddi Gesalaga; laukoa Patricia Martinek osatzen du. Hauek 75 kiloko zilindrikoa, 62,5 kiloko kubikoa eta 62,5 kiloko esferikoa altxatu beharko dituzte, eta bakoitzarekin bi minutuko denbora tartea izango dute.
Aizkoran, berriz, Julen Alberdi Txikia IV.a azkoitiarra eta Mikel Larrañaga azpeitiarra ariko dira nor baino nor fgizonezkoen finalean, eta beraiekin batera, Xabier Zaldua eta Hodei Ezpeleta Bihurri; 60 ontzako lau enbor eta 54 ontzako sei enbor ebaki beharko dituzte. Emakumezkoetan, Nerea Arruti, Uxue Ansorregi, Karmele Gisasola Zelai III eta Oihana Fernandez de Barrena lehiatuko dira, eta 45 ontzako eta 54 ontzako bina enbor moztea izango da haien egitekoa.
Banakako finalez gain, Xabier Aranburu Guzta idiazabaldarrak marka saiakera egiten ahaleginduko da. Bere buruari jarri dion erronka 200 kiloko kubikoarekin izango da.