AZTI zentro teknologikoak aste honen hasieran eman ditu aurtengo antxoaren kosterari buruzko datuak. Euskal arrantzaleei esleitutako kuota 8,05 milioi kilokoa izan da, eta kuotearen %90 arrantzatu dute, hau da, 7,2 milioi. Lonjako batez besteko prezioa kiloko 2,05 eurokoa izan dela ere jakinarazi du –iaz 1,5 eurokoa izan zen–.
Emeterio Urresti Getariako Kofradiako presidenteak esan du "balorazioa ona" dela, eta horretarako bi arrazoi nabarmendu ditu: batetik, datuek erakutsi dutelako antxoa espeziea errekuperatu egin dela, eta bestetik, aurten aurreneko aldiz nork bere kuota kudeatu ahal izan duelako. "Gipuzkoako eta Bizkaiko arrantzaleok kudeatu dugu geure kuota, eta etekin gehiago atera diogu, geuk kontrolatu dugulako zer tamainatako antxoa harrapatu. Arrain handia bakarrik arrantzatu dugu, eta horrek prezioan eragin positiboa izan du", azaldu du.
Aurreneko proba eginda, hurrengo urtean kudeaketa eredu berriarekin jarraitzeko gustura da Urresti.
Berdelarekin kezka
AZTIk koordinatutako Juvena 2025 kanpaina zientifikoak amaitu du Bizkaiko Golkoan antxoa gazteen populazioaren ebaluazioa, eta jakinarazi du "lortutako estimazioek ugaritasun-maila handia berresten" dutela, eta gazteen biomasa 544.781 tonatan kokatzen dutela. "Kopuru horrek batez besteko historikoa bikoizten du". Urrestik gogorarazi du antxoa galtzeko zorian egon zela, eta hiru urteko geldialdi biologikoa eginda berreskuratu dela. Esan du orain berdela egon daitekeela antzeko egoeran: "Europako Batasunak abenduaren 12an erabakiko du berdelarekin zer egin. Adituek proposatu dute kuota %70 murriztea, espeziea galtzear omen dagoelako. Hala bada, egin dezatela geldialdi biologikoa. Baina estatuek ez dute nahi, arrantzaleei diru asko ordaindu beharko lieketelako".