Olatuek hondartzetara edo arroketara eramandako itsas hondakinak biltzeko elkartuko dira datorren larunbatean, hilaren 29an, Gipuzkoako sei puntutan. Zarauzko hondartza eta Zumaiako Itzurun hondartza dira aukeratutako lekuetako batzuk. Jarduera goizean egingo dute, 11:00etatik 13:00etara bitartean.
Itsas Zaintza Sareak deituta egingo dute bilketa datorren zapatuan. Itsasoarekin lotura duten 50 eragile inguruk osatzen dute aipatu sarea, eta Gipuzkoako Foru Aldundiaren babesa du. Haien esanetan, Mater Ontzi Museo Ekoaktiboak sortutako sare horrek itsasoaren kontserbazioa sustatzeko helburua du, "inplikatutako eragileen ezagutza, ahalegina eta konpromisoa azpimarratuz".
Larunbateko jarduera sareko kideek identifikatutako lekuetan egingo dutela ere iragarri dute, "ingurune naturala garbi mantentzeko eta hondakinek ingurumenean duten eraginari buruzko kontzientzia sortzeko".
Bilketan parte hartzeko asmoa dutenei aurrez izena ematea gomendatzen zaie, itsaszaintzasarea@mater.eus helbidera idatzita edo 619 81 42 25 telefono zenbakira deituta.