Gipuzkoako Herri Txikietako Areto Futbol Kopako finalak jokatuko dituzte datorren zapatuan, ekainak 7, Bidania-Goiatzen (Gipuzkoa). Herri horretako pilotalekuan jokatuko dituzte finalak, baina areto futbol partidaz gain, egun guztiko festa egingo dute han, eguna herri afari batekin borobilduz. Guztira, zortzi partida jokatuko dituzte Bidania-Goiatzen, tartean gizon gazteen zein helduen eta emakumeen finalak.
Eskualdeko ordezkariek ere parte hartu dute lehian, hala nola Errezilgoek, Aizarnazabalgoek, Arroabekoek. Hain justu, gazteen kopako finala jokatuko du Aizarnazabalek, helduen B kopako finala Errezilek, eta emakumeen arteko finala lehiatuko dute Aizarnazabalek eta Arroabeak. Arratsaldean zehar, zozketak egingo dituzte, eta behin partida denak jokatuta, 20:30ean sari banaketa egingo dute kirol munduko aurpegi ezagunekin.
Liga amaitu eta gero, apirilaren 11n hasi zuten kopa txapelketa, eta bi mailatan banatuta, zortzi taldek parte hartu dute lehian. A mailan aritu dira Bidania-Goiatz, Itziar, Leaburu-Txaramako Uzturre eta Ikaztegietako Kutturru taldeek, eta, aldiz, B mailan, Itsasondoko Ijitok, Ikaztegieta, Errezil eta Arroa Behea taldeak. Itzuli bateko ligaxka jokatu dute, eta onenek lortu dute kopa txapelketaren azkeneraino iristea.
Hona hemen zapatuko egitaraua:
- 10:00. Gazteen kopako 5. eta 6. postuak: Bidania-Goiatz vs Itsasondo.
- 11:00. Gazteen kopako 3. eta 4. postuak: Errezil vs Betelu.
- 14:45. Gazteen kopako finala: Berrobi vs Aizarnazabal.
- 15:30. Gizon helduen B kopako 3. eta 4. postuak: Itsasondoko Ijitok vs Arroabea.
- 16:30. Gizon helduen B kopako finala: Errezil vs Ikaztegieta.
- 17:30. Gizon helduen A kopako 3. eta 4. postuak: Leaburu-Txarama vs Itziar.
- 18:30. Gizon helduen A kopako finala: Bidania-Goiatz vs Ikaztegietako Kutturru.
- 19:30. Emakume helduen finala: Aizarnazabal vs Arroabea.
- 20:30. Sari banaketa ekitaldia.