Gipuzkoako Batel Liga iritsi da hondarrera, gaur izango baita azken jardunaldia Pasaian (Gipuzkoa). Gainera, Gipuzkoako Txapelketarako sailkapena ere izango da estropada hori. Txapelketako finalak bihar bertan jokatu dituzte gaur aurreneko lau postuetan sailkatzen direnek. Bosgarren eta zortzigarren postuen artean sailkatzen direnek, berriz, federazio kopa jokatuko dute.
Gaurko jardunaldia 15:00etan hasiko da, eta erlojuaren aurka ariko dira ontziak. Bihar, berriz, 10:30ean hasiko da txapelketa; lau kaletara jokatuko dute hori.
Ohi bezala, lau kategoritan egingo dute arraunean: infantilak hasiko dira, ondoren kadeteen txanda izango da, gero jubenilena, eta, azkenik, absolutuena. Azken kategoria horretan, gizonezkoetan bost talde lehiatuko dira 17:10etik aurrera: Hibaika, Zarautz, San Juan A, Zumaia eta San Pedro. Emakumezkoetan, berriz, soilik bi talde, 16:56an: San Juan A eta Hibaika.
Eskualdeko ontziak
Eskualdeko ordezkaririk ez da faltako gaur Pasaian: Getariak bi ontzi aterako ditu infantil nesketan, ontzi bat kadete nesketan, eta bi ontzi jubenil mutiletan. Oriotarrek ontzi bana infantil neska eta mutiletan, eta kadeteetan nesken ontzi bat eta mutilen hiru. Ligatik kanpo ariko dira oriotarrak, baina biharko txapelketarako sailkapenaren bila aterako dira.
Zarautzi dagokionez, ontzi bat aterako du infantil nesketan, bi ontzi infantil mutiletan, ontzi bat jubenil nesketan, eta absolutu mutilen ontzia ere lehian izango da.
Azkenik, zumaiarrek ere izango dute ordezkaritza ligaren azken txanpan: ontzi bana aterako du infantil nesketan, kadete neska eta mutiletan, eta absolutu mutiletan.