Urtzi Gurrutxaga erremontista aizarnazabaldarrak eta Joseba Goikoetxea Goikoetxea VI.a zestoarrak hitzordu garrantzitsua dute bihar, Hernaniko Galarreta pilotalekuan: Berria txapelketaren finala jokatuko dute, elkarren kontra. Atzelari zestoarrak Ander Goikoetxea Goikoetxea V.a urnietarra (Gipuzkoa) izango du bikotekide; aurrelari aizarnazabaldarrak, berriz, Aritz Eskudero andoaindarra (Gipuzkoa). 15:15etik aurrera, ETBk zuzenean emango du finala.
Berriak eta Oriamendi 2010 enpresak elkarlanean antolatzen dute Berria txapelketa, erremontea sustatzea eta erremontista gazteenei tokia egiteko helburuarekin, eta Goikoetxearentzat eta Gurrutxagarentzat biharkoa ez da izango txapelketa horren finala lehiatuko duten azken aldia. Iaz ere elkarren kontra jokatu zuten, eta ordukoan zestoarra gailendu zitzaion aizarnazabaldarrari.