Zestoako Wadna elkartea eta Orioko zenbait boluntario Sahararen aldeko elikagai eta material bilketa ari da egiten gaur, zapatua. Goizean, Zestoako udaletxe azpiko arkupetan egon dira zenbait kide, baita Azkoitiko Erosi supermerkatuan; azken herri horretan 21:00etara arte egongo dira, gainera. Orion, berriz, Herriko plazan jarri dute produktuen bilketarako postua 11:00etatik 13:00ak bitarte.
Tindufeko kanpalekuetan bizi diren milaka errefuxiatuei laguntza eskaintzeko asmoz, eskatu dituen produktuen artean daude arroza, pasta, oliotan bildutako atuna nahiz sardinak, azukrea, konpresak eta lekaleak —babarrunak, dilistak, garbantzuak—.
Kalean bezala, herriko kastetxeetan ere egingo dute bilketa astelehenetik aurrera; ostiralera bitartean, Azkoitiko Xabier Munibe ikastolan eta Floreaga ikastetxean izango dute herritarrek elkarteak eskatutako produktu horiek guztiak uzteko aukera. Zestoan, berriz, Arroabeko zein Aizarnako eskola txikietan eta Zestoako Herri Ikastetxean. Materialak eta elikagaiak eskolen sarreretara bideratzeko eskatu dute, eskolekin koordinazioan.
