Ion Etxeberria erremontista azpeitiarrak e-Remonte enpresak antolatutako Gabonetako Erremonte Txapelketaren finala jokatuko du. Etxeberriak Agoitzen (Nafarroa) jokatu zuen txapelketaren finalaurrekoa ostiralean, Mikel Otanoren aurka, eta 30 eta 16 nagusitu zen azpeitiarra. Hasieratik izan zen nagusi Etxeberria, eta bereziki sakean asmatu izanak eman zion hari finalerako txartela.
Horrenbestez, Ionek eta Utergak neurtuko dituzte indarrak txapelketaren final handian. Datorren ostiralean, hilak 27, jokatuko dute finaleko partida, Iruñeko Labriten.
Larrañaga, finalaren atarian
Binakako Erremonte Txapelketako finalaren atarian geratu da, aldiz, Iban Larrañaga erremontista azkoitiarra. Txapelketako finalaurreko partida jokatu zuten atzo Urriza-Larrañaga eta Ezkurra II.a-Azpiroz bikoteek, Hernaniko (Gipuzkoa) Galarreta pilotalekuan, eta Ezkurra II.ak eta Azpirozek lortu zuten hilaren 28an jokatuko den finalerako txartela. Bi set nahikoa izan zituen bikote irabazleak finalera sailkatzeko, 10 eta 15eko emaitzarekin amaitu baitzituzten bi jokoak.
Horrenbestez, nafarrek jokatuko dute Binakako Erremonte Txapelketako finala, Beñat Segurola aizarnazabaldarraren eta Barrenetexea IV.aren aurka. Segurolak eta Barrenetxeak hilaren 14an jokatutako partidan lortu zuten finalerako txartela, Ezkurrari eta Azpirozi 15-4 eta 15-8 irabazita.
