Zumaiako Udalak neurriak hartuko ditu aste honetako marea biziak direla eta

Juan Luis Romatet 2024ko ira. 18a, 09:44

Ura Zumaian ubidetik aterata artxiboko argazki batean.

Marea biziak dira eta itsasgora altuak espero dituzte datozen egunetarako. Hori dela eta, kalteak ekiditeko, neurri batzuk hartzea aholkatu die udalak herritarrei. Orioko Udalak ere adi ibiltzeko eskatu die herritarrei.

Marea biziak izango dira datozen egunotan kostaldean. Marea altuena biharko, osteguna, dago aurreikusita. Itsasgorarekin, bost metro gora egin dezake itsasoak. Hori dela eta, itsasoak sor ditzakeen kalteak ahal dela ekiditeko, neurriak hartzeko eskatu die Zumaiako Udalak herritarrei. Orioko Udalak ere adi ibiltzeko eskatu die oriotarrei.

Euria ere iragarrita dago asteburu bueltako egunetarako. Horri itsasgora bereziki altuak gehituko zaizkio. Hori dela eta, zuhurtziaz jokatzea eskatu du Zumaiako Udalak. Hala, gomendatu du itsasgora orduetan itsasadar inguruko eremuetan kotxeak ez aparkatzea, hain zuzen Arranplan, Txomin Agirre kaian eta Axular Ibiltokietan. Leku horietan atera izan da ura aurrekoetan. 

Bere aldetik, udalak bestelako neurri batzuk hartuko ditu. Adierazi duenez, estolda-zuloak itxiko dituzte itsasoko ura kaleetara ez heltzeko. Bestalde, hodi sistema guztia errebisatuko duela ere azaldu du, balizko arazoak saihesteko.

Itsasoak gainezka egingo balu, udaltzaingoak beharrezko neurriak hartuko dituela ere gaineratu du, "eremuak itxiz edo trafikoa desbideratuz, herritarren segurtasuna bermatzeko".

Orioko Udalak, berriz, itsasgoren ordutegia zabaldu du:

  • Gaur, asteazkena: 05:11n eta 17:29an.
  • Bihar, osteguna: 05:52an eta 18:11n.
  • Etzi, ostirala: 06:32an eta 18:52an.

 

Gukak zu bezalako irakurleen babesa behar du tokiko informazioa euskaraz eta modu profesionalean lantzen jarraitzeko.


Izan Gukakide