Bart banatu dituzte jatetxe onenak aitortzen dituen 2024ko Repsol Gidako Eguzkiak Cartagenan (Murtzia), eta Eguzki banarekin itzuli dira etxera Zestoako Araneta jatetxeko Joseba Odriozola eta Zarauzko Aiten Etxeko Javi Sierra.
Repsolek nabarmendu duenez, "euskal sukaldaritza tradizionala defendatzen" duen jatetxea da Araneta, eta eskaintzen dituzten arrainen eta haragien kalitatea azpimarratu dute sariketan. Era berean, erretegiko txuleta jarri dute eskaintzaren barruko "erregin" gisa. Aranetan sukaldaritza "mimoz" egiten dutela nabarmendu du epaimahaiak.
Zarauzko Ur Bare hoteleko Aiten Etxe jatetxe berrituari dagokionez, Javi Sierrak parrillarekin dituen abileziak nabarmendu ditu Repsolek, eta azaldu du "karta tradizional baina eguneratu batekin" defendatzen dutela jatetxearen eskaintza.
Iaz, Zumaiako Hamarratz jatetxeak eskuratu zuen Repsolen Eguzki saria.
Honako hauek dira gaur gaurkoz eskualdean Repsolen Eguzki sari bana duten jatetxeak:
- Gure Txokoa (Zarautz).
- Kirkilla Enea (Zarautz).
- Aiten Etxe (Zarautz)
- Hamarratz (Zumaia).
- Iraeta (Zestoa).
- Araneta (Zestoa)