Txita ibiltari bat Zarauzko eta Getariako kaleetan ibiliko da bihar eta etzi, hurrenez hurren, Emakumeok Mugimenduan APPa ezagutarazteko. Gipuzkoako Foru Aldundiak garatu du aplikazioa, eta bi helburu ditu: batetik, lurraldeko emakumeei egunerokoan egiten duten jarduera fisikoa erregistratzeko aukera eskaintzea, horren bidez, haien ohituretan eragiteko eta haiek motibatzeko; eta, bestetik, mugimenduarekin bat egiten duten emakumeen sarea eratzea.
Bada, aplikazioak erabiltzaileei eskainiko dizkien baliabide guztiak xeheago azaltzea izango da, hain justu, aipatu txita ibiltariaren zeregina. Horretarako, bi dinamizatzaileren laguntza izango du goizean eta arratsaldean, 10:30etik 13:30era eta 15:30etik 18:30era arituko baita sustapen lan horretan.
Gainera, txita herrian dagoen bitartean emakumeek doan erabili ahalko dituzte udalerriko kiroldegiko azpiegiturak. Are gehiago egingo dute Getarian; izan ere, emakumeei zuzendutako bi jarduera antolatu dituzte: 17:00etan emakumeei zuzendutako spinning saioa izango da, eta, 18:30ean Saltaka taldearen lehenen irteera, autobus geltokitik abiatuta.
Zarauzkoa eta Getariakoa ez dira txitak eskualdean egingo dituen geldialdi bakarrak. Gipuzkoa osoan zehar dabil, eta hil honen amaieran, 30ean eta 31n, Azkoitira eta Zestoara iritsiko da.