Organo Erromantikoaren Nazioarteko XXIV. Zikloa, atzo, ostirala hasi zen Azpeitian Loreto Aramendi organo jotzaile oriotarraren eta ARV-Vocem euskal abesbatzaren emanaldiarekin. 19:30ean eskaini zuten kontzertua, Loiolako basilikan. Nazioartean hainbat errezitaldi eskainitako organo jotzailea da Aramendi. Gaur egun, Donostiako Koruko Andre Mariaren basilikako Cavaillé-Coll organoaren (1863) organista titularra eta nazioarteko kontzertista da. ARV-Vocem abesbatza, berriz, belaunaldien arteko euskal abesbatza da, orain gutxi sortua.
Azkoitian eta Bergaran, gaur emango dio organo zikloak hasiera. Esther Ciudad organo jotzaile zaragozarrak eta Juanjo Guillem perkusionista valentziarrak estreinatuko dute zikloa Azkoitian, 20:00etan. Bergarako Santa Marina Parrokian, aldiz, Óscar Rodríguez organo jotzailearen eta Martin Zulaika oboea eta korno ingeles jotzailearen txanda izango da, 20:00etan.