Aste honetan zalaparta eragin du bateko eta besteko hondartzetan marmokak agertu direlako, eta zenbaitzuk ziztadak ere jaso dituztelako. Eskualdeari dagokionez, Zarauzko hondartzan bandera gorria ezarri behar izan zuten astelehenean arrazoi horrengatik, baina atzo eta gaur bestelakoa da egoera. Getarian, Zarautzen eta Zumaian sorosleek jakinarazi dute marmoka bat edo beste badagoela, baina bainua ez dute debekatu, eta beraz, normaltasuna da nagusi hondartza horietan.
Orioko Antilla hondartzan, berriz, ez dute marmokarik atzeman oraingoz. Hango sorosleek kontatu dutenez, "zaila da Oriora marmokak iristea kanpoko barrak oztopatzen duelako, baita itsasadarraren korronteak eta haizearen norabideak ere". Dena den, inguruetan marmoka talde handiak baldin badabiltza, Oriora ere irits daitezkeela aitortu dute.
Marmokak hondartzetara noiz eta zergatik gerturatzen diren Gonzalo Torre biologo zumaiarrak azaldu dio hedabide honi.
