52 kilometroko ibilbidea egingo dute XXX. Zarauztarra Sarian txirrindulari proban parte hartzen duten lehen urteko eta bigarren urteko kadeteek. Zarautzen Astitik atera, eta Nafarroa kaletik parrokia aldera egingo dute, han Getariarantz jarraitzeko N-634 errepidetik. Zumairaino iritsiko dira, eta saihesbidetik Txikierdira iritsiko dira, Oikiara hartu, Aizarnazabalerantz segi Iraetara arte, eta handik Arroara jarraituko dute.
Arroa Behean, berriz Txikierdira, eta bigarren buelta egingo dute, Oikia, Aizarnazabal, Iraeta eta Arroa zeharkatuz. Gero, berriz Getariarako bidea hartuko dute, eta Zarautzen Nafarroa kale osoa zeharkatuko dute, autobideko biribilgunean kanpinerako bidea hartuz. Han izango da helmuga, Mendibeltz bidean.
Zirkulazioa tarteka eten egingo du Udaltzaingoak Zarautzen, baina mozketa puntualak izango direla azaldu du. Jaurlaritzako Trafiko Zuzendaritzak ere gogorarazi du zirkulazioari eragingo diola txirrindulari proba horrek.