Eusko Jaurlaritzako Kultura Sailak jakinarazi duenez, 2,5 milioi euro bideratuko ditu koronabirusaren ondorioz diru sarrerarik gabe geratu diren kulturgintzako langileei oinarrizko soldata bat bermatzeko.
Datorren astetik aurrera egongo da laguntza eskatzeko aukera, eta laguntzak iraupen zehatza izango du: martxoaren 14tik krisia amaitu bitarte. Gehienez 1.200 eurokoa izango da oinarrizko errenta, eta aurreko urteetako errenta aitorpenaren arabera kalkulatuko dute zenbatekoa.
Enplegu Sailak esan du diru poltsa hori Ogasun Sailarekin adostutakoa dela, eta Eusko Jaurlaritzak onartutako gainerako laguntza lerroen “osagarri” izan nahi duela. Kultur formakuntzarako diru poltsa erabiliko dute errentak bermatzeko.
Hain justu, gaur eguerdian bi eguneko greba digitalera deitu dute kulturgintzako 300dik gora eragilek. Itxialdiaren eraginez, kulturaren sektoreak bizi duen egoera salatzeko deitu dute grebara apirilaren 21ean eta 22an, baita euskal herritarrak gogoetara bultzatzeko ere. Paradigma aldatzea ere nahi dute kulturgileek.