Azpeitiko Lagun Onak Mendi Bazkunak iganderako Santa Engraziko (Aizarna, Zestoa) eguna antolatu du. Egun guztiko mendi irteera antolatzeaz gainera, Santa Engrazin bertan eta Aizarnan hainbat ekitaldi antolatu dituzte.
09:00etan irtengo dute mendizaleek Azpeitiko plazatik, eta haur eta gaztetxoak autobusez joango dira Zestoara. Helduek, berriz, Azpeititik Santa Engrazira oinez joateko aukera izango dute. Gero, 18:00etan, Aizarnatik Azpeitira itzultzeko autobusa jarri dute mendizaleek. Autobuserako aurrez izena eman behar da mendizaleen webgunean (www.lagunonakmb.org/eu/). Autobuserako izena emateko azkenengo eguna bihar da; Lagun Onak MBko bazkideek 4 euro ordaindu beharko dute eta gainontzekoek 6 euro.
Autobusez Zestoara joan eta bertatik 09:30ean abiatuko dira Santa Engrazira. Eguerdian, Beheko bentan salda beroa izango da mendizaleentzako. Gero, haurrentzako jolasak eta erromeria antolatu dituzte. Bazkaltzera, berriz, Aizarnara jaitsiko dira, eta handik 18:00etan Azpeitirako autobusak irtengo du.
Eibar-Ondarroa atzeratuta
Bestetik, Azpeitiko Lagun Onak-eko mendizaleek larunbaterako Gipuzkoako Itzuliko Eibar-Ondarroa irteera zuten iragarrita, baina hori atzeratu egingo dute: «Azkoitia-Azpeitia maratoi erdia da egun horretan, eta ibilaldia atzeratzea erabaki dugu».